Isarel leh Hamas-in tang inthleng thawh thumna nei

Gaza Strip-a inkahhai puang mek, Israel leh Palestinian pawl, Hamas chuan inremna an siam hnuaiah tang inthleng thawh thumna an nei leh.

Hamas hian Ningani khan an mi hren mek zinga mi pariat an chhuah leh a, Israel mi pathum leh Thailand mi panga an ni. Israel sipai hmeichhia an hren Agam Berger-i bakah Isarel civil mi Arbel Yehoud leh Gadi Mozes te an chhuah a, Thailand mi an chhuahte hming erawh puanzar a ni lo thung.

Israel lamin an ram jail-a tang mek, Palestinian zinga 110 an chhuah ve bawk. An mi chhuah zingah hian dam chhung tang tura hremna pek mi 32 an tel a, naupang 30 an bawk niin Hamas chuan an tarlang. Israel-in Palestinian mi a chhuah zingah hian al-Aqsa Martyrs Brigades hotu hlui, Zakara Zubeidi bakah, Israel thawhpui Palestinian hmeichhia a thah avanga dam chhunga tang tura hrem Mahmoud Atallah, Israel mi 12 thattua puha thiam loh chantir Ahmed Barghouti te pawh an tel.

Naktukah hian tang inthleng thawh lina hi kalpui chhunzawm a ni dawn bawk. Hamas lam hian an mi hren mek zinga Israel mi pathum an chhuah dawn niin Israel prime minister Benjamin Netanyahu chuan a sawi a ni.