Palestinian mite la lut turin Jordan leh Egypt ngen

US president Donald Trump chuan Gaza Strip-a Palestinian mite an rama la lut turin Jordan leh Egypt a ngen. Jordan lal King Abullah leh Egypt president pawh a biak tawh thu a sawi. Mahse he rawtna hi Gaza Strip-a roreltu, Hamas chuan an thlawp lo a, Jordan leh Egypt pawhin an thlawp lo bawk.

Trump chuan Gaza hmun chu tih chhiat mek a ni tiin, thenfai vek a ngai a ni, a ti. Palestinian mi la lut tura a ngenna pawh hun rei tak awh tur pawh a nih mai theih thu a sawi bawk. Jordan-ah hian Palestinian hi maktaduai eng emaw zat an awm mek a, Egypt-ah pawh sing tel an awm bawk. Mahse heng ram pahnih leh Arab ram dangte chuan Gaza-a Palestinian mi awmte an rama lak luh erawh an duh lo.

Hetih lai hian Israel finance minister Bezalel Smotrich chuan President Trump rawtna chu ṭha a tih thu a sawi thung a, a taka kalpui a ni theih dan tur pawh a ngaihtuah tur thu a sawi.

Hamas lam erawh chuan Gaza-a cheng Palestinian-ten an chenna aṭanga hnawhchhuah hlen an hlauh thu an sawi nawn leh. Hamas political bureau member, Basem Naim chuan Gaza chhuahsan hlen theihna tur lam rawtna engmah Palestinian lam hian an pawm dawn lo, a ti. Official dang Sami Abu Zuhri pawhin Trump chu a thlak tak, Joe Biden-a ngaihdan awmze nei lo leh hlawhchhamna ang kha nei ve lo turin a chah bawk. Palestinian president Mahmoud Abbas pawhin Trump thusawi chu a dme thu sawiin, "Kan mite chu an ramah an awm zel dawn a, an in leh lo an chhuahsan dawn lo," a ti.

Israel hian kum 1967 aṭang khan Gaza Strip hi a luah a, kum 2005-ah a sipaite hnukdawk mah se Gaza airpace, seafront leh motor luh dan tur chungchangte chu a la thunun vek a ni.