Israel sipai hotuin banna theh lut

Israel sipai hotu, lieutenant general Herzi Halevi chuan October 7, 2023-a Hamas firfiakten Israel an beih chungchangah, a mawhphurhna a hlen zo lo nia sawiin Thawhlehni khan banna a theh lut.

Banna lehkha a thehluhah, Halevi chuan October 7-a firfiakte pawikhawihna thleng an dang lo chu a mawhphurhnaah a ngaih thu sawiin, Hamas nena an inbeih meknaah an tum ber la hlawhtling lo mah se, an sipaiten hlawhtlinna an chan chhoh zel avangin ban hi a hun ta nia a ngaih thu a tarlang bawk. "Indonaa kan thil tum ber chu a la hlawhtling vek lo. Mahse sipaite chuan Hamas leh an rorelnate ti chhe turin an bei chhunzawm zel dawn a ni," a ti. March 6-ah a hna aṭanga chawlh tir tur hian a ngen a, hemi hma chu Hamas te pawikhawihna chhui hna leh, sipaite thuam chakna turin theihtawp a chhuah zel dawn tih a tarlang a ni. Haveli hian sipai hotu hna hi kum 2023 January aṭang khan chelhin, kum thum term tur a ni.

Halevi bakah han Israel southern military command hotu major general Yaron Finkelman pawhin banna a theh lut bawk.

Israel eptu hruaitu, Yair Lapid chuan Halevi thil tih dan chu fakin, prime minister Benjamin Netanayhu pawh sipai hotu chet dan hi entawn turin a ti zui. 'Tun hi mawhphurhna lak a, ban ngam a hun a ni," tiin a sawi.

Kum 2023, October 7-a Hamas ten Israel chhim lam an beih khan Israel mi 1,200 vel an thatin mi 250 an man bawk. An mi thah zinga a tam ber hi civil mi an ni. Hamas-te pawikhawihna chhang a, Israel-in Gaza Strip-a indo puanga beihpui a thlaknaah Palestiniain mi 47,000 chuang an thi tawh bawk.