Mpox vangin Sierra Leone ah emegency puang

Africa khawthlang lama Sierra Leone ram chuan an rama mpox vei pahnih hmuh an nih hnuah ram pumah public health emergency a p uang.

Health minister Austin Demby chuan he hri hlauhawm tak vei hi pahnihna hmuh chhuah anih hnuah, Thawhṭanni khan health emergency puan a nih thu hi a sawi a ni.

African Union health watchdog chuan nikum khan mpox hri leng vang hian public health emergency hi a lo puang tawh a ni. Hemi hnuah kar liam tak khan Sierre Leone-ah mpox vei hmasa ber hi hmuh a ni a, a hnuah pakhat dangin a vei tih hriat chhuah a ni leh bawk. Mpox vei hmuhchhuah pahnite hian damlo dang emaw, he hri vei ransa nena inhnaihna an neih hriat a nih loh thu Ministry of Health and Sanitation chuan a tarlang. An pahnih hian Freetown damdawi-inah enkawl mek niin, an ngaihtuahawm lo niin an sawi bawk.

Minister Demby chuan mpox vei pahnih hmuh chhuah a ni chunga public health emergency an puan chhan sawifiahin, sorkarin he hri leng dona kawnga chak zawka hma a lak a, a darh zel tur venna leh hri kaite enkawlna ṭha pek thuai an nih theihna tur a ni tih a sawi. Ramri lamah pawh uluk zawka enfiah a nih tur thu leh, ram pumah mpox chungchanga mipuite zirtirna kalpui a ni dawn tih a sawi bawk a ni.

Monkeypox tia sawi bawk, mpox hri hi kum 1958-a hriat chhuah niin, Cenral leh West Africa-a a vei hmkuh chhuah hi an tam ber a ni. Kum 2022 khan he hri hi mipat hmeichhiatna hmanga inkaichhawn theih a ni tih tihchian a ni ta a, a hmaa mpox hri la hmuh ngai lohna ram 70 chuangah hmuh a ni ta bawk.