Gaza-a inkahhai puanna turin inbiakna chhunzawm

Gaza Strip-a inkahhai puan a nih theihna tura inbiakna chu Qatar khawpui, Doha-ah chhunzawm a ni a, Israel leh Hamas aiawhte chuan inremna an siam dawn hnai tawh nia sawi a ni.

Palestinian official chuan Israel leh Hamas aiawhte hi hmaichhanah inbe lo mah se, a ṭum khatna atan building khatah inbiakna hi neih a ni tih sawiin, Thawhṭanni khan darkar ruk vel an inbia a ni, a ti.

US president-elect, Donald Trump-a'n January 20-a President atana lak luh a ni hmaa inremna siam a nih loh chuan a pawi thui thei dawn nia a vau hnuah, inremna siam thuai a nih theihna atan hian chak taka hma lak mek a ni. US president Joe Biden chuan Pathianni khan Israel prime minister Benjamin Netanyahu leh inremna siam a nih theihna atana palai hna thawktu, Qatar emir Sheik Tamin bin Hamad al-Thani a bia a ni.

Inremna siam turah hian a ni khatnaah Hamas-in Israel mi an mi hren pathum an chhuah ang tih chu Israel leh Hamas hian an remti a, hemi hnu hian Gaza-a mipui tamna bial aṭangin Isarel sipaite lak chhuah ṭan an ni ang. Ni sarih hnuah Hamas hian an mi hren zinga pali chhuah belhin, Israel pawhin Gaza chhim lama tlanchhiate chu hmarlamah an kir a phalsak dawn bawk. Inremna thawh khatna hian ni 42 awhin hemi chhung hian Isarel sipaite hian Philadelphi corridor-a an awm chhunzawm a, buffer zone aṭanga meter 800 china an awm phalsak an ni bawk ang.

Israel hian Palestinian mi, an ram jail-a tang mek zinga 1,000 chhuah a remti bawk. An zingah hian kum 15 leh aia tam tang tura hrem mi 190 an tel a, Hamas lamin Israel mi an mi hren 34 an chhuah ve dawn bawk a ni.

Inremna thawh hnihna leh thawh thumna kalpuina tura inbiakna chu inkahhai puan aṭanga ni 16-a neih tura tih a ni bawk.