President Biden-a'n Pope hnenah chawimawina sang hlan

US President kalchhuak tur, Joe Biden chuan Pathianni khan Catholic kohhran hruaitu, Pope Francis hnenah President-in civil mi hnena chawimawina a hlan theih sang ber, Presidential Medal of Freedom with Distinction a hlan.

President Biden hian Inrinni liam ta khan chawimawina hi Pope kutah ngei hlan tura Rome-ah kal a tum a, mahse California state-a ram kang nasa tak thleng vangin a zin tur hi a ṭhulh a, Pathianni khan Pope hi phone-a biain, chawimawina sang dawng tura a thlan thu hi a hrilh a ni.

Biden chuan Pope a ngaihsan thu hi a X-ah tarlangin, Catholic Kohhran hruaitu hi 'People's Pope' tiin a sawi. Khawvel pum tana rinna, beiseina leh hmangaihna kengtu a nih thu sawiin, a inngaihtlawmna leh inpeknate chu ṭawngkama sawi chhuah sen a nih loh thu a tarlang. Biden hian US President a nih chhunga Presidential Medal of Freedom with Distinction a pek vawi khatna a ni. Amah pawh hian he chawimawina hi Barack Obama president lai khan a lo dawng tawh bawk.