Impeachment hearing hmasa berah Yoon inlan tum lo

South Korea president aṭanga Yoon Suk Yeol paihthlak a nih dawn leh dawn loh chungchang ngaihtuahna, impeachment hearing chu vawiin hian Constitutional Court chuan a nei ṭan dawn ta. Mahse Yoon hi hearing hmasa berah hian inlan a tum lo.

Yoon-a defence attorney, Yun Gap-geun chuan dan dik lo taka Yoon manna tur thupek, warrant arrent tih chhuah leh a nih avangin a himna tur ngaihtuah a ngai a ni, a ti. Thubuai ngaihtuahnaa President a lan dawn chuan, a mimal himna leh venhimna lam chu chinfel hmasak phawt a ngai niin a sawi.

Vawiin aṭanga ṭanin, hearing hi ṭum nga, February 4 thleng neih a ni ang. Vawiina hearing neih tura Yoon hi a inlan loh chuan, Constitutional Court chuan session hi ti tawpin, Ningani-ah session vawi hnihna a nei leh ang. Hemi hunah hian Yoon hi a la inlan loh fo chuan, a awm lo chungin a thubuai hi ngaihtuah a ni tawh ang.

Hetih lai hian investigator lam chuan Yoon hi thu zawhfiah turin man an la tum ve reng bawk. Mahse investigator office hmalakna leh impeachment hearing chungchang erawh case hran ve ve an ni thung.