Canada PM thar tur inrinsiak

Canada prime minister Justin Trudeau chuan Thawhṭanni khan rorellai, Liberal Party hruaitu thar thlan a nih hnuah Prime Minister a nihna aṭanga a ban tur thu a puang. Hemi hnu hian amah thlaktu tur hi an inrinsiak nasa nghal hle. PM thar tura sawirik zingah hian finance minister hlui Chyrstia Freeland, New Democratic Party (NDP) hruaitu Jagmeet Singh leh transport minister Anita Anand te an tel.

Kum 53 mi, Justin Trudeau hi kum 2015 aṭang khan Canada PM niin, tun hnaiah duh lotu an pung nasa hle a, hei bakah an party chhungah innghirnghona pawh a tam hle. An ram chhunga thil man sang chak leh, interest rate sang te, in leh lo indaih lohna nasa tak awm avangin mipui nawlpuiin PM hi bang turin an nawr nasa hle a, hei bakah an party chhung ngei aṭang pawhin bang tura nawrna a tawk bawk. Hei vang hian party hruaitu thar thlan a nih hunah ban a tum a ni. Mahse amah thlaktu tur thlan fel a nih hma chuan PM dinhmun hi a la chelh chhunzawm ang.

Canada ram inthlanpui hi October 20, 2025 hmaa neih a ngai a, inthlanah hian House of Commons-a seat la hnem berin sorkarn an siam ang, an party hruaitu chu prime minister a ni ang. Mipui ngaihdan lakah chuan a tam zawkin inthlanah hian Liberal Party hian Conservative party hnehin sorkarna an siam leh an ring.

Canada ramah hian Conservative Party-in kum 10 chhung ro an rel hnuah kum 2015 khan Trudeau kaihhruai Liberal Party hi thlan tlin niin, kum 2021 khan a term thumna atan thlan tlin leh an ni.