Vietnam-in ruihhlo tawlh luttu mi 27 thi turin hrem

Vietnam court chuan an rama ruihhlo tawlh luttua puha thiam loh chantir mi 27-te chu thi turin an chungthu a rel. Heng mite hian March 2018 leh November 2022 inkar khan Cambodia aṭangin Vietnam-ah ruihhlo chi hrang hrang - heroin, ketamine leh methamphetamine kg 600 chuang an tawlh lut nia sawi a ni.

State media chuan thi tura an chungthu relsak zingah hian gang leader, hmeichhia Vu Hoang Anh pawh a tel niin a tarlang. Kum 67 mi niin, a hmain ruihhlo tawlh vangin kum 20 tang tura hrem a lo ni tawh a, mahse kum 2009 khan ngaihdam a ni. Hei bakah pawikhawihna dang vangin jail-ah ṭum eng emaw zat a lo lut tawh bawk.

Ruihhlo tawlhtu pawlah hian member 35 awmin, an zinga pariat chu kum 20 aṭanga dam chhung tang tura hremna pek an ni bawk. An pawl hian ruihhlo tawlhnaah hian manchhuah an nih lohhna turin social media network Signal tih an hmang a, phone number pawh US leh Cambodia number an hmang ṭhin a ni. Thi tura hremna pekte hi an tih hlum hun tur erawh an la sawi lang lo.

Vietnam ram hi ruihhlo siam chhuah tamna, 'Golden Triangle' a hnaih avangin an ram khawpui, Ho Chi Minch chu ruihhlo tawlhten an hmunpuiah an hmang nasa hle niin police-te chuan an sawi. Vietnam ramah hian heroin gram 600 chin kawl leh, methamphetamine kg 2.5 chin kawl an man chu thi tura hrema pek theih an ni. Ruihhlo tawlh kaihhnawihah hian Vietnam court chuan thi tura hremna pek a ngah tawh hle a, khawvel huap pawhin tang ti hlum tam ber an ni mek niin Amnesty International chuan a sawi. Thi tura hremna pekte hi a hma chuan firing squad-ten an kap hlum ṭhin a, mahse kum 2013 aṭang khan chiu hlum an ni tawh a ni.