Israel-in missile interceptor supply turin IAI inremna siampui

Israel defence ministry chuan December 25, 2024 khan Israel Aerospace Industries (IAI) chu Arrow 3 missile interceptor tam zawk supply turin inremna a siampui.

Arrow 3 hi atmosphere pawn lamah pawh ballistic missile lo kap thla thei tura duan a ni. Israel hian he hmanrua hi thla 14 kalta chhung khan an ram beihna atana long range ballistic missile kah chhuah lo danna atan a hmang ṭangkai le. A bikin Yemen helpawl, Houthi lakah a hmang fo a, kumin April leh October thlaa Iran-in Israel a beih ṭum pawh khan he missile interceptor hi an lo chhawr ṭangkai hle a ni.

Inremna an siamah, IAI hian Arrow 3 interceptor hi tam tham tak, shekel tluklehdingawn tel hu a supply dawn tih Defence Ministry chuan a sawi.

Israel defence minister, Israel Katz chuan, "Israel hian khawvela air defence ṭha ber a nei a ni," tiin Arrow missile chu missile laka lo invenna ṭha tak tur a nih mai bakah, Israel industry theihna ropui zia lantirtu a nih thu a sawi bawk. Israel in air defence dang a hman, short-range Iron Dome, medium-range David's Sling leh long-range Arrow hi an ram chhunga siam vek an ni.

Defense Ministry Director-General Eyal Zamir pawhin Arrow 3 interceptor chuan ballistic missile hmanga beih an tawhna tur tam tak a lo dang tawh a ni tih sawiin, inremna siam hian an ram mi sang tel tan hna a siamsak dawn bawk a ni, a ti.