Russia-in US leh Europe-a zin lo turin an mi leh sa chah

Russia sorkar chuan holiday season-ah Russia khua leh tuite chu US leh a thawhpui ramte bakah, Europe ramahte zin lo turin a chah.

Ministry of foreign affairs thupuangtu, Maria Zakharova chuan an ram mipuite hnenah thuchah hi ti chhuakin, official thil a nih loh chuan US ah zin lo turin a ti a, US leh Russia inlaichinna chu a ṭha lo hle tih a sawi. Hei bakah hian Canada leh, European Union-a US thurualpui ramte pawh tlawh lo turin a chah bawk.

Ukraine leh Russia indona thleng mek avangin tun lai hian Russia leh US inkar hi ṭha lo zual hle nia sawi a ni. Russia chauh ni loin, US pawhin America mite chu Russia rama zin lo turin an lo ti tawh bawk a, man an tawh palh mai theih thu a sawi a ni.

Kum 2022, February thlaa Russia-Ukraine indona thlen hnuah US hian Ukraine sipaite puihna hi USD tld 62 hu zet a pe tawh a ni. Hei hi Russia chuan ngaimawhin a sawisel fo a ni. An boruak ti chhe zual turin thla liam ta khan US chuan Ukraine hnenah long-range missile a pek chu Russia ram chhung kahna atana hman a lo phalsak tawh bawk. Hei bakah hian US hian Ukraine hi loan, USD tld 20 pe bawkin, US president Joe Biden chuan Ukraine hian Russia thil neih a laksak aṭangin a loan hi a rul dawn tiin a sawi.