Hijab telloa online concert neih vangin zaithiam thubuai siamsak

Iran zaithiam, Parastoo Ahmandi chuan Nilaini zan khan a YouTube channel kaltlangin online concert a nei a, mahse a lu khuhna, hijab a hman loh avangin thubuai siamsak a ni.

Parastoo Ahamdi hian online concert a neihnaah hian hijab a hman loh bakah, kawrfual dar bah hain a dar te a lang bawk a ni. A concert neihna hmun hi sawilan a ni lo a,mahse inchhungah a ni lo niin a lang. Band member, mipa vek pali an lang tel bawk.

Iran-in dan a hman mekah chuan hmeichhiate chu pawn an chhuahin an lu khuh vek tura tih an nih bakah, mipui hmaah a mala an zai khap a ni bawk. Ahmadi hian a Instagram page-ah in chhunga hijab hmang loa a zai lai video a lo post fo tawh a, mahse tun ṭum hi pawn lamah a zaina record a tih chhuah hmasa ber a ni.

Iran judiciary chuan Ningani khan thuchhuah siamin, hmeichhe pakhat leh a band chuan dan leh sakhaw inkaihhruaina dan kalhin an zai a ni, a ti a, Ahmadi hi a hminghmerh erawh chuan a sawilang lo. Singer leh a online concert ti chhuaktute chungah thubuai siamsakin, dan ang taka hma lak a nih tur thu a tarlang bawk. Iran sorkar hian hmeichhiate inthuam dan tur, dress code a siam zawm lote hremna na zawk pek an nih theihna tur dan thar hi siam a tum a, he dan thar hnuaiah dress code zawm lote chu thi tura hremna thleng pek theih an ni dawn niin Amnesty International chuan a sawi.