President Biden-a'n thiam loh chantir mi 39 ngai dam

US President kalchhuak tur, Joe Biden chuan Ningani khan tan ina hren mek 1,500 te hremna a tih nep bakah, thiam loh chantir tawh mi 39-te a ngaidam. Hei hi US chanchina ni khatah President-in mi a ngaihdam tam ber ṭum a ni.

Hremna a tih nep sakte hi Covid-19 hripui len laia hri tidarhtua puha man, tan in aṭanga chhuah an nih hnu pawha kum khat tal pawn chhuak loa in hren zui tura tihte an ni.

America President-te hian an term a tawp hmain hetianga tang ngaihdam hi an nei ṭhin a, kum 2017 khan Barack Obama pawhin a President term tawp hma lawkin ni khatah mi 330 a lo ngaidam tawh bawk. President Biden chuan tang mek zing aṭanga zahngaihna lantir tura ngenna thehlut dangte pawh a la ennawn leh tur thu a sawi.

Ningania President Biden-a'n a ngaihdam te hi ruihhlo kaihhnawiha thiam loh chantir te an ni hlawm niin White House lam chuan an sawi. An zingah hian emergency response team hruaitu hmeichhe pakhat pawh a tel a, ani bakah kohhran hruaitu, addiction counselor leh youth counselor anga thawk te, doctor zirlai leh military veteran pawh an tel.