Trump-a'n President lak luhnaa tel turin China President a sawm

US President-elect Donald Trump chuan China president Xi Jinping chu nakkum January thlaa US President tana lak luh inkhawm buatsaihah tel turin a sawm.

Donald Trump press secretary, Karoline Leavitt chuan President Xi sawm a nih thu hi sawiin, hei hi ram inhal tak nia ngaih reng, US leh China inkar boruak siamṭhat leh tih chakna tura hmalakna kawng khat a nih thu a sawi. Leavitt chuan, "Hei hi Presient Trump-a'n kan ram ṭhianṭha hruaitute chauh ni lo, kan elpui ramte nen pawh inhawng taka inbiakna neih a duhzia a lantir a ni," tiin Fox News a hrilh. Hetih lai hian China President hian a sawmna hi a pawm dawn nge, a aiawh mi dang a tir dawn tih hriat a la ni lo thung.

Trump leh a team hian El Savador president Nayib Bukeke, Italy prime minister Giorgia Meloni leh Argentina president Javier Milei te pawh US President thar lak luh inkhawma tel tur hian an sawm tawh bawk. Heng hruaitu pathumte hi Trump thawhpui ṭha tak takte an ni.

Joint Congressional Committee on Inaugural Ceremonies leh State Department kutah US President lak luh inkhawma ram dang palaite sawmna hi a awm ṭhin a, mahse ram hruaitu lu ber hi president-elect leh a team ten an duh ang an sawm thei a ni. Trump hian nakkum January thlaa US President atana lak luh a nihna turah hian ram dang hruaitu lute an tel ṭhat a duh nia sawi a ni a, mahse sawmna an pek zat erawh sawichian a la ni lo.