Malaysia leh Thailand-ah tuilian vangin mi 12 thi thithithi thi

Ruahsur nasa avangin Malaysia leh a ṭhenawm, Thailand ramah tuilian nasa tak a thleng a, mi 12 an thi niin official-ten an sawi.

Malaysia hmar lamah tuilian vang hian mi nuai 1.2 te chuan an chenna in an chhuahsan a, Thailand chhim lamah mi 13,000 vel chu an insawn chhuak bawk. Ruah a la sur chhunzawm zel avangin hmun danga insawnchhuak pawh hi an la pun rin a ni bawk.

He chhiatna hi kar liam ta tir lam aṭanga thleng niin, tuilian hian in leh motor-te a chim nasa tawh hle. Thailand-ah Pattani province-ah chuan hospital pahnih chu tuiin a chim nasat avangin khar a ni a, damdawi lam hmanruate pawh tuiin a chim chhiat a hlauhthawnawm hle niin an sawi.

Tuilian vang hian Thailand chhim lam province parukah emergency puan a ni a, sorkar chuan province tina chhawmdawl hna thawhna atan hian baht mtd 50 (USD mtd 1.7) ṭheuh a ruahman. Thailand-a tuilian hian chhungkaw nuai 5.5 chuang a nghawng a ni.

Malaysia-ah chuan tuilian hi Thailand ramri bul, Kelantan state in a tuar nasa ber a ni. He state-a cheng zinga 63% vel chu hmun him lama sawnchhuah an ni tih National Disaster Management Agency chuan a sawi. Kelantan bakah state dang pasarihin tuilian hi an tuar tel bawk a ni. Tuilian tuarte chhanchhuak leh hruai chhuak tur hian lawng, motor leh helicopter-te tirh an nih thu deputy prime minister Ahmad Zahid Hamidi chuan a sawi.