SKorea-ah kum 52 chhunga vur sur nasat ber thleng

South Korea khawpui, Seoul-ah nimin khan vur thli tlehin vur a sur nasa hle. Kum 52 chhunga November thlaa vur a sur nasat ber ṭum thlengin, thlawhtheihna tam tak thlawk chhuak thei loin an awm a, traffic pawh a buai phah hle.

South Korea weather agency chuan an ram khawpui, Seoul hmarlam leh a bul vela vur tla chu centimeter 20 a tling niin a sawi. Vur tla nasa avanga Hongcheon khuaa motor panga chetsualna thlengah mi pakhat thiin, mi dang pali an hliam bawk a ni. An ram laili, khawchhak lam leh chhim thlang lam bialah pawh vur tla hi cm 10-23 an tling a ni. Weather agency chuan vawiin chawhnu lam thlengin hmun tam zawkah vur hi a la sur chhunzawm dawn tih an sawi. Thlawhtheihna 220 chu cancel leh tihkhawtlai an ni a, kawng 90 pawh din tir an ni bawk.

President Yoon Suk Yeol chuan mipuite chu fimkhur turin a chah a, transport ministry pawh vur sur leh tla vanga traffic accident thlen thei tur veng turin an hmanraw neih angte thawh chhuah pui turin a ti bawk a ni. Mipuite hnenah khaw chin awm dan tur leh traffic information pawh a rang thei anga hriattir ṭhin turin official-te a hrilh bawk.