Australia Parliament-in kum 16 hnuai lamin social media an hman khapna bill pass ta

Australia Parliament lower house, House of Representatives chuan nimin, November 27, 2024 khan nupang kum 16 hnuai lamin social media an hman khapna bill siam chu an pass ta. Senate-in a pawm ve hunah tun kar chhung hian 'law' ah chantir hman beisei a ni.

Party tam berin he bill hi an thlawp a, social media platform hrang hrang - TikTok, Facebook, Snapchat, Reddit, X leh Instagram te chuan he dan hi an zawm loh chuan Australian dollar mtd 50 (USD mtd 33) thleng chawitir theih an ni ang.

He bill hi law a chantir a nih hnuah, social media platform te hi kum bithliah chin khuahkhirhna siam turin kum khat hun pek an ni dawn a ni.

Australia mipui tam zawkin he hmalakna hi a thlawp laiin, sawiseltu tam tak an awm ve bawk. Sawiseltute chuan naupangten social media an hmuh dan a dik lo zawngin a nghawng thei a, hei bakah he bill siam tur hian Parliament hi a hmanhmawh mah mah a, uluk taka zirchianna a nei lo a ni tiin, a hlawhtlin tak tak an rin loh thu an sawi. Kum bithliah china khuahkhirhna siam hi user dangte privacy pawh a ti derthawng vek thei a, nu leh paten an fate tana ṭha tur ngaihtuaha an thuneihna pawh laksak an ni, an ti.