Israel-Hezbollah inkahhai puan a ni ta
Israel cabinet chuan Lebanon-a Hezbollah laka beihpui a thlak mek laka inkahhai puang tura US leh France rawtna siam chu a pawm ta a, nimin aṭang khan hman nghal a ni. Hetih lai hian Gaza Strip-a beihpui a thlak erawh a la chhunzawm dawn thung a, Palestinian firfiak, Hamas chu an la bei zel dawn tih an sawi.
US leh France-in inkahhai puanna tur rawtna an siam Israel cabinet chuan Thawhlehni zan khan ngaihtuahin vote lak a ni a, 10 in an pawm laiin member pakhat erawh chuan a pawm lo thung.
US president Joe Biden chuan nimin zing khan Israel-Lebanon inkahhai puan a nih thu leh, nimin zing dar 4 aṭang khan hman ṭan a nih thu a sawi. Inbiakna neihah hian Hezbollah lam an tel lo a, an pawl aiawhin Lebanon Parliament speaker Nabih Berri a tel thung a ni.
Inkahhai puan chhung hian Israel leh Hezbollah hian ralthuam an che lek tur a ni lo a, an inremna siam hi Hezbollah hian an bawhchhia a nih chuan na takin an chhang let nghal dawn tih Israel prime minister Benjamin Netanyahu chuan a sawi. He inremna siam hian Gaza leh Iran laka a insawrbing tir theih phah dawn niin Netanyau chuan a sawi a, Israel sipaite pawh a intuaithar thei dawn a ni, a ti. Hamas nuaibo tura an hmalakna chu tih hlawhtling ngei an tum thu leh, an mi hren mekte pawh hruai haw vek an tum thu Israel Prime Minister chuan a sawi.
Israel-Lebanon inremna siamah Lebanon chuan ni 60 chhungin an ram chhim lam, Israel ramri bul hnai Hezbollah awmte thlak turin an sipaite an dah lut ang a, heng hmun aṭang hian Hezbollah helte chu an ralthuam nen inhnukdawkin Litani River lamah insawn tura tih an ni. He hmun hi 2006-a Israel-Hezbollah indona thleng tawpnaa ramri-a an siam a ni. Israel pawhin hemi chhung hian Lebanon ram aṭangin a tah tawlin a sipaite a la chhuak ve bawk ang.
Hezbollah nena inkahhai puan chungchanga Israel mipuite ngaihdan lakah, Israel mi 37% chuan inkahhai hi an thlawp laiin, 32% chuan an thlawp lo a, 31% chuan ngaihdan an nei lo tih an sawi.
October 7, 2023-a Hamas firfiakten Israel chhim lam beia, mi 1,200 an thah leh mi tam tak an man hnuah, Israel chuan Hamas rorelna, Gaza Strip-ah beihpui thlakin tun thlengin an la inbei chhunzawm reng a ni. Lebanon helpawl, Hezbollah hian Hamas an thlawpna lantirin Israel hmar lam an lo bei ve nghal bawk. Israel leh Hezbollah hi thla 13 vel an inbei tawh a, hemi chhung hian Israel beihpui thlakna avangin Lebanon-ah mi 3,823 thiin hliam tuar 15,859 an awm a, hmun him lama tlanchhia mi maktaduai khat vel an awm bawk. Israel hmarlam ramri bula cheng, mi 60,000 vel pawh Hezbollah te beihna vang hian hmun him lamah an insawn chhuak tawh bawk a ni.