Spain-a tuilian tuartuten chirhin an lal an vawm

Spain rama tuilian vanga chhiatna nasa tak thlenna, Spain khawchhak lama Valencia chu Pathianni khan Spain lal, King Felipe, Queen Letizia leh prime minister Pedro Sanchez-ten an tlawh. He hmuna cheng mi ṭhenkhat lungawi lo chuan an lal leh a zuitute hi chirhin an lo vawm a ni.

Valencia bialin chhiatna a tawrh chungchangah hian thuneitu lam chu hma la chak tawk lo leh, tuilian thleng tur chungchangah mipuite warning pe loa puhin sawisel an lo tawk tawh a ni. Chhiatna a thlen hnuah pawh emergency service chuan hma a la chak tawk lo niin an sawi bawk.

Mipui lungawi loten lal leh a zuitute chirha an vawm lai hian an bodyguard-te chuan nihliap kap parhin an lo veng a, mahse chirh hian a fuh nual tho a ni. Lalnu Letizia pawhin a hmai leh samah te chirh a kai a, a bodyguard pakhat chuan mipuiten hmanraw danga an vawm fuh avangin a hmai a thi bawk a ni.

Spain sorkar chuan tuilian leh chhiatna thleng thei tur chungchanga mipuite hnena warning pek chu a bial, regional thuneitute mawhphurhna a ni, an ti. Valencia province thuneitute chuan information an hmuh veleh an theih anga ranga hma an lak thu an sawi ve bawk.