Spain tuilian vanga thi 200 an chuang tawh; Chin hriat lohte dama hmuh beiseina tlem tawh

Spain rama tuilian vanga thi chu mi 214 an tling tawh a, chin hriat loha awm mek mi eng emaw zat chu dama hmuh an beiseiawm tawh lo niin an sawi bawk.

Kar liam ta Thawhlehni, October 20, 2024-a Spain khawchhak lam, Valencia biala tuilian hi kum tam tak hnua Spain in tuilian vanga chhiatna a tawhna nasa ber a ni. Tuilian hian motor tam tak hnawlin, lei tam tak a chim bawk a, khaw eng emaw zat chirhin a la hnawh a, thenfai hna thawh mek a ni. Valencia khawpuia courthouse chu ruang dahna hmun atan hman a ni bawk.

Tuilian tuarte chhanchhuah hna thawk tur hian sipai 2,500 leh police officer 5,000 tirh an ni tawh. Heng mite pui turin Spain sorkar chuan Inrinni khan sipai 5,000 dang a tirh belh leh. Prime minister Pedro Sanchez chuan buaina avang ni loa Spain rama armed force-ten beihpui an thlakna lian ber a ni tih sawiin, sorkar chuan harsatna tuarten chhanchhuah leh chhawmdawl hna thawhna kawngah a theih ang ang chu a hmang zel dawn tih a sawi.

Civil Guard chuan Zirtawpni liam ta thleng khan tuilian tuar mi 4,500 chuang an chhan chhuak tawh tih interior minister Fernando Grande-Marlaska chuan a sawi bawk.

Spain pui tur hian France aṭangin volunteer eng emaw zat an kal a, tuilian tuarte chhanchhuahna tur leh, bawlhhlawh tling khawmte thenfaina tur hmanraw pawimawhte an keng nghal a ni.

Valencia bialah mi sang tel chuan electric supply leh telephone network an la nei lo a, hei vang hian report kimchang pawh hriat theih a la ni lo. Police-te chuan chhiatna thleng mek karah motor leh tlereuh dawr aṭanga thil ru mi 50 an man tawh tih an sawi.