NKorea-in ballistic missile kap chhuak

North Korea chuan nimin, October 31, 2024 khan intercontinental ballistic missile a kap chhuak a, minute 86 a thlawh hnuah an ram khawchhak lam tuipuiah a tla niin South Korea leh Japan chuan an sawi. Ballistic missile a kah chhuah tawh zinga thlawk rei ber niin an sawi bawk.

ICBM hi km 7,000 (mel 4,530) a sang a han thleng a; a sang zawng ni lo, a khamphei zawnga kah chhuah a nih chuan hemi aia thui daih hi a thleng thei dawn a ni.

South Korea chuan Nilaini khan North Korea hian US president thlanna, November 5-a neih tur hnai vaiah ICBM kah chhuah a tum niin a lo sawi tawh. Nimina an kahchhuah hian an ralthuam kah theih chin chu a hlain a sang zel tih lantir an tumna niin SKorea defence ministry chuan a sawi. A thiltih avangin NKorea hrekna thar hi an siam leh dawn tih an sawi bawk.

US chuan nimina NKorea in ICBM a kah chhuah chu UN Security Council resolution palzutna lian tak a nih thu a sawi ve nghal. White House National Security Council thupuangtu, Sean Savett chuan NKorea hian mi dang tihchhiatna tura dan loa ralthuam siam leh ballistic missile programme kalpui chu a mipuite ṭhatna tur ngaihtuah aiin a dah pawimawh zawk a ni, a ti.