Spain-ah tuilian vangin mi 95 thi

Spain ram khawchhak lam, Valencia province-ah Thawhlehnia ruahsur nasa takin tuilian a thlen vanga thi chu nimin thleng khan mi 95 an tling tawh a, chin hriat lohin mi tam tak an la awm. Tuilian tuarte chhanchhuah hna hi thawh mek a ni.

Tuilian hian lei leh building eng emaw zat a hnawl a, chin hriat loha awm an la tam avangin thi zat pawh hi an la punchhoh a rinawm thu sorkar chuan a sawi.

Prime minister Pedro Sanchez chuan chhiatna thleng vanga thite chu ram pumah ni thum chhung sun a ni dawn tih Nilaini khan a puang. Thi zinga mi 92 hi Valencia-a mite niin, Valencia khawthlang lama awm Castilla-La Mancha-ah mi pahnih leh, Malaga-ah British mi pakhat a thi bawk.

Tun ṭuma tuilian an tawrh hi kum 1973 hnua Spain rama tuilian a thlen leh nasat ber a ni a, hemi kum hian Spain chhim chhak lamah tuilian vangin mi 150 in nunna an chan a ni.

PM Sanchez chuan tuilenna biala chengte chu chiai lo tura chahin, a kaihhruai sorkar chuan chhanchhuah leh chhawmdawl hna chu theihtawpin a thawk dawn tih a sawi. 'Spain ram pumpuiin an ngaihtuah em em cheu a, kan thlahthlam dawn lo che u," a ti.

Chhiatna thleng chungchangah hian disaster relief lam hotute chu an che chak lo nia puhna a awm a, warning an pe har a, hei vang hian mi tam tak chu an insaseng hman lo nia sawi a ni. Chhiatna thlenna hmuna duty tur dah ṭhin, civil protection agency chuan an ram huna Thawhleni zan dar 8:15 thleng pawh khan warning an ti chhuak lo niin an sawi a, hetih lai hian Chiva leh khaw dang eng emaw zat chuan darkar hnih dawn tuilian hi an lo tuar tawh nia sawi a ni bawk. Valencia regional goverment pawh tuilian leh ramkang thleng ṭhin buaipui tura sorkar hmasain alo din, Valencia Emergency Unit a ṭhiah avangin sawisel a tawk nasa hle a ni.