Hezbollah hotu tharin Israel lakah indo kalpui zel tum: 'Temporary appointment' - Israel Defence Minister

Lebanon helpawl, Hezbollah hotu thar, Naim Qassem chuan Hezbollah hotu a nih anga thu a sawina hmasa berah, an pawlin Israel an dona chu an chhunzawm zel dawn tih a sawi.

Israel sipaiten Hezbolla hotu, Hassan Nasrallah leh a thlaktu tura sawi, Hashem Safieddine an tih hlum hnuah, Iran thlawp helpawl hian October 29 khan an pawl hotu thar atan Qassem ruat a nih thu hi an puang a ni.

Qassem chuan, "Indona tura ruahmanna kan lo duan tawh chu kan chhunzawm zel dawn," tiin, Nasrallah thuthlung chu a zawm zel tur thu a sawi. Indona thleng mekah October 7, 2023-a Hamas-ten Israel an beih ṭuma Israel thlavang hauhtute chuan, kum 75 chhungin Palestinian te tawrhna, an rama an hmun thianghlim leh an thil neihte ruksak an nih chungchang chu an theihnghilh a ni, a ti.

"Engmah ti loa an chet hun lo nghah ai chuan lo do let a, invenna tura lo beih kan tan a ṭha zawk, kan inpeih reng a ni. Min ti thinur a nih chuan kan theihna zawng zawngin kan hmachhawn ang. Tumahin kan tan min beihsak lo, hei hi mi zawng zawngin lo hre rawh se. Mimal tana bei kan ni lo a, kan vaia tana bei kan ni," tiin a sawi.

Hezbollah hian Nilaini khan rocket hmangin Israel hmar lam, Metula khaw bula Israel military base chu rocket hmanga beiin, Israel mi pahnihin hliam an tuar. Hliam tuarte hi Haifa-a Rambam Hospital-ah hruai an ni.

Hezbollah Radwan Force deputy chief kap hlum

Israel Defence Force (IDF) chuan Nilaini khan Hezbollah elite Radwan Force-a deputy commander, Mustafa Ahmad Shahadi chu tun hnaia airstrike an neihah a thi tih an puang.

Mustafa Ahmad Shahadi hi Lebanon chhim lam, Nabatieh-a fighter jet-in beihpui a thlaknaah a thi a ni. Shahadi hi Israel leh Israel sipaite beihna hrang hrangah inhnamhnawih niin, kum 2012-2017 chhunga Syria-a inbeihnaah pawh Radwan Forces chetnaa a mawphurtu ber a ni tih IDF chuan a sawi. Shahadi thah chu Hezbollah Radwan Force chakna tih nep theihna tur leh, IDF beitu firfiakte nuaibo an nih zel theihna tur a ni tiin an sawi. Radwan Force hian Israel hmarlam luhchilha beih an tum nia sawi ani a, mahse an ruahmanna ang hian an kalpui thei ta lo tih Israel media chuan a tarlang.

'Temporary appointment' - Israel Defence Minister

Israel defence minister Yoav Galland chuan Hezbollah-in an pawl hotu atan Naim Qassem ruat a nih thu an puan chu X-ah chhangin, a dinhmun hi a chelh rei dawn lo tiin a sawi. 'Temporary appointment, A rei dawn lo' tiin Qassem thlalak nen a dah a ni.

Israel sorkar pawhin Qassem hian an pawl hruaitu hmasate tihdan chhunzawm a, an hnung a zui a nih chuan Hezbollah chanchina an pawl hotu dinhmun chelh rei lo ber a ni thei tiin a vau bawk. Lebanon sorkar chuan buaina awm mek chu a chingfel duh tak tak a nih chuan Hezbollah pawl ṭhiah a ni tiin, he an ngaihdanah hian an ding nghet zel dawn tih a puang.