EU-in pem lutte thawn kir dan rawtna siam dawn

European Union (EU) Commission president, Ursula von der Leyen chuan an member state hrang hrang hnena lehkha a thawnah, ram dang mi pem lutte a tam thei ang thawn kir an nihna tur rawtna an siam dawn tih a sawi.

Von der Leyen hian European Commission hotu dinhmun hi a term hnihna atan a chelh leh a, Europe ram hrang hranga pem lut an pun zel chungchangah hma la tura nawrna pawh a tam hle a ni.

Member ramte hnena lehkha a thawnah, Von der Leyen chuan EU rama dan loa pem lut, thawn kirte chu 20% vel chauh a ni tiin, an rama kir leh tura hrittir tam zawk chuan EU ram chu an chhuahsan lo tihna a ni, a ti. Tam tak chu an pemna ramah an awm lui a, ṭhenkhat erawh EU ram dangah vek an pem sawn leh mai niin a tarlang. Italy-in pem lut chungchanga policy a siam aṭang chuan inzir an ngai tih a sawi.

Italy hian hun rei tak a lo buaipui tawh, pem lutte buaipui dan tur a siam chu a hmang ṭan a, he ruahmanna hnuaiah ram danga pem tum, Mediterranean aṭanga an chhanchhuahte chu Albania-a center an siamah thawn zelin, an rama luh an dilna chungchang a ngaihtuah chhung chu he hmunah hi an awm zel dawn a ni.

Europe ram hrang hrangte hian ram dang aṭanga pem lut an pun chak avangin harsatna an tawk nasa tawh a, hei vang hian pem lut chungchang hi an buaipui tawh hle a ni. Germany chuan land border kaltlanga an rama lutte enfiahna tur a dah tawh a, France sorkar pawhin immigration dan khauh zawk siam a tum mek a, Poland chuan an rama lutte awmzui phalna pek ṭhin chu tihtawp rih a tum bawk.