Bangladesh ram danpui siamṭha tur commission din

Muhammad Yunus kaihhruai Bangladesh sorkar lailawk chuan an ram danpui ennawn a, a ṭul anga siamṭha turin member pakua awmna commission a din.

Constitution Reform Commission hian Bangladeshi-American professor Ali Riaz-a'n a kaihruai a, ni 90 chhungin sorkarah report an thehlut ang. Commission member-ah hian zirlai aiawhin Mahfuj Alam pawh telh a ni a, ani hi chief adviser Muhammad Yunus special assistant a ni. Member dangte chu - Dhaka University Law Department professor pahnih Sumaiya Khair leh Muhammad Ikramul Haq, Barrister Imran Siddique, Supreme Court lawyer advocate Dr Sharif Bhuiyan, Barister M Moin Alam Ferozi, writer Firoz Ahmed leh human rights activist Md Mustain Billah te an ni.

September thla khan Chief Advisor Yunus chuan an ram judiciary, election system, administration, police, anti-corruption commission leh constitution siamṭha turin commission paruk din a nih tur thu a lo puang tawh a ni.