2024 Nobel Prize in Medicine dawng tur puang

Kum 2024 atana Nobel Prize dawngtu turte puan an leh ṭan a, Thawhṭanni khan a hmasa ber atan Physiology/Medicine-a lawmman dawng tur puan a ni.

American scientist pahnih - Victor Ambros leh Gary Ruvkun te chu microRNA an hmuh chhuah avangin Nobel Prize in Physiology or Medicine 2024 dawng turin an thlang.

MicroRNA an hmuh chhuah hian khawvel nunna lo awm dan leh, tissue hrang hrangin mihring taksa a siam dan hrilhfiahna kawngah a pui a ni. MicroRNA hian organism chhunga genes thunun a nih dan thlengin a nghawng a ni. He chawimawina hian Swedish kronor mtd 11 ( USD 810,000) a keng tel a, lawmman dawngtute hian an insem ang. Prof Ambror (70) hi University of Massachusetts Medical School-ah thawkin, Prof Ruvkun (72) hi Harvard Medical School-a professor nilai a ni bawk. Medicine and physiology prize dawng turte hi Nobel Assembly of Sweden-a Karalinksa Institute Medical Unversity in a thlan a ni.

2024 Nobel Prize dawng turte hi October 7 - 14 chhung hian puan an ni dawn a, medicine prize dawngtu tur hi puan hmasak ber an ni ṭhin. Nobel prize dawngtute hi laureate tih a ni a, pawisa fai bakah green gold medal leh diploma an dawng tel ṭhin.

Nobel Prize dawng tura thlante area/field pakhatah mi pathum aia tam thlan an ni ngai lo a, mahse Nobel Peace Prize dawng tur erawh chuan mi mal emaw, pawl emaw pawh thlan an ni thei thung.