Gaza-ah Hamas thlawp lotu an pung

Israel-Hamas indona thleng avanga mipuite tawrhna nasa tak a thlen avangin, Gaza Strip-a Palestinian chengte zingah rorellai, Hamas thlawp lotu an pung zel.

October 7, 2023-a Hamas-ten Israel chhim lam an beih hnuah Israel chuan Hamas-te hi bei let ve nghalin, Gaza Strip-ah kum khat an indo tling tawh a ni. Indona avang hian civil mite tawrhna nasa tak a thleng a, hei vang hian Gaza-a chengte zingah pawh Hamas laka lungawi lo an pung chho zel a ni.

Palestinian mite chuan Israel hmelma pui ber tih an pawm thu an sawi rualin, October 7-a Israel beih a nih chungchangah a mawhphurtu bera an ngaih, Hamas hruaitu Yahya Sinwar chuan thil a chhut sual nia ngai niin an ngai. Hams hian an thil tihin mipuite a nghawng dan tur leh, tawrhna a thlen dan tur an ngaihtuah tawk lo tiin, Israel an beih chu an tihsual lian tak nia ngai pawh eng emaw zat an awm bawk.

Gaza Strip-a Israel-Hamas indona thleng vang hian Palestinian mi 42,000 vel an thi tawh nia sawi a ni a, heng bakah mi tam tak chuan an in leh lo tlanchhiatsanin camp-ahte an khawsa mek a, ei leh in lam thlengin an tuar a ni. Indona a thlen hma khan an khawsak chu nuamsa lutuk ni lo mah se, in leh lo leh hna te neiin, nundan phung pangngaiin an nung ve thei tih an sawi.

Palestinian Center for Policy and Survey Research (PSR) in September thla laihawla Gaza mipuite ngaihdan a lakah, 57% chuan Israel an bei hmasa chu a dik lo niin a ngai. June thlaa ngaihdan lakah kha chuan Hamas ten an ti dik lo nia ngaitu kha 39% chauh an la awm a ni.

Hamas hruaitu hlui, Ahmed Youssef Saleh pawhin July thla khan Hamas mi leh sate chuan Israel an beih hma khan a nghawng let dan tur an zirchiang hmasa ber tiin a Facebook-ah a lo zawt tawh bawk. He a thu post-ah hian Palestinian mite ngei pawhin Hamas chetdan hi an sawisel nasa hle.

Hetih lai hian Hamas te hian an pawl kalh leh sawiseltute chu kut thlakin an sawisa fo nia sawi a ni a, hei vang hian mipuite pawhin a langsarin an dodal ngam lo. July thla khan Oct 7-a Israel beih a nih chungchang sawiseltu, Palestinian activist Ameen Abed chu hmai tuam mi ṭhenkhatin na taka sawisain, damdawi-in dah a ngai hial. Mahse tun hnaiah erawh mipuite hian Hamas laka an lungawi lohna hi an lantir ngam ṭan nia sawi a ni.