Israel-in darkar hnih chuang Beirut chhim lam bei leh Hezbollah hruaitu thar Safieddine chin hriat a ni lo
Israel chuan Inrinni zan reiah Lebanon khawpui, Beirut chhim lama Hezbollah helpawl hmun a bei leha, darkar hnih chuang beihpui a thlak a ni.
Israel Defence Force (IDF) chuan an Telegram channel-ah beihpui an thlak thu hi sawiin, Hezbollah infrastructure te an kap tih an sawi. Beihpui an thlak hma hian Israel sipaite chuan Beirut chhim lama chengte chu insaseng tura hriattirin, an building kah tum aṭanga meter 500-a hlaah tal awm turin a hriattir lawk.
September 23, 2024 aṭangin Israel hian Lebanon hi ṭum eng emaw zat kap tawhin, mi 1,110 an thih tawh bakah mi maktaduai khat chuang chu hmun him lamah an tlanchhe tawh bawk nia sawi a ni.
Safieddine chin hriat lohin awm mek
Hezbollah pawl hotu lu ber, Hassan Nasrallah chu kar liam ta khan Israel sipaiten Beirut chhim lam an bomb-naah a thi a, a thlaktu tura ngaih Hashem Safieddine pawh Israel-in a beih leh hnuah a chin hriat lohin a awm mek.
Hezbollah lam hian Safieddine hi an be pawp thei tawh lo nia sawi a ni a, mahse an pawl chuan hemi chungchangah hian official-a thuchhuah erawh an la nei lo.
Israel sipaite hian Zirtawpni liam ta zing lamah khan Beirut chhim lam an beihnaah Hezbollah intelligence headquarters an kap fuh tel a, hetih lai hian he hmunah hian Safieddine leh Hezobollah intelligence hotu, Hajj Murtada chu an awm nia sawi a ni. Mahse Hezbollah lam chuan an thih leh thih loh chungchangah sawi an la nei lo a, Israel lamin an bomb chhunzawm reng avangin an la ngaihven thei lo niin an sawi thung.
Israel-in Gaza mosque leh school a bei - Hamas
Gaza Strip-a rorellai, Palestinian firfiak pawl Hamas sorkara health ministry chuan Israel chuan nimin zing khan Deir al-Balah a Ibn Rushd school leh Al-Aqsa Martyrs mosque a bei a, mi 26 an thi niin a tarlang.
Health ministry chuan school hi indona avanga tlanchhia, Palestinian mite tawmhimna atana hman niin a sawi. Israel chu civil mite awmna hmun bomb-ah a puh.
Hetih lai hian Israel sipate chuan Gaza-a Hamas firfiakte chet lakna hmun , command and control centre te a kap niin a sawi thung. Beihpui an thlak hma hian civil mite tawrhna thlen lo thei tur ang berin hma an lak thu leh, boruak aṭanga enfiah bakah intelligence aṭanga information pawh an lak thu an sawi. Hamas ho chu Israel an beihna kawngah civil mite leh an awmna hmunte chu inphenna atana hmangah an puh ve thung a ni.
Biden-a'n Iran oil field bei lo turin Israel a duh
Iran-in missile tam tham tak hmanga a beihna chu Israel chuan a chhan let ngei chu khawvel ram hrang hrangte rin dan a ni a, mahse eng ang takin nge chet a lak a, phuba a lak dawn tih chu ngaihven reng a ni.
Israel hian Iran chu an chhang let ngei dawn tih sawi tawh mah se, a chet tum dan erawh engmah a la sawi lang lo. Hetih lai hian Iran nuclear facility leh oil hmunte a beih hlauhthawnna a lian hle.
US president Joe Biden chuan White House-a chanchin thar lakhawmtute a kawmnaah, Israel chuan eng kawng emaw takin Iran chu a chhang ngei dawn tih rin thu a sawi a, hemi rual hian Israel prime minister Benjamin Netanyahu chu Iran oil facility bei lo tura a duh thu a sawi. Hemi hma hian Iran nuclear hmunte pawh Israel chuan bei lo se a duh thu a lo sawi tawh bawk.
Biden chuan, "Israel hian an bei let dan tur engmah an la sawi lo. Mahse an dinhmunah ding ni ta ila, oil field bei loin chet lak dan dang ka ngaihtuah ang," a ti.