Venezuela eptu hruaitu Spain-ah a tlanchhia

Venezuela sorkar chuan an ram President thlannaa eptu pawl candidate, Edmundo González chu Spain-ah himna zawngin a tlanchhia niin a sawi.

July thlaa President thlanna neihah khan sorkar thunun, National Electoral Council (CNE) chuan president ṭanglai, Nicolás Maduro chu chakah a puang a ni. Mahse eptu lam chuan hei hi pawm loin, González hi a chak zawk a, CNE chu vote tlak dan kimchang pawh ti chhuak duh loah an puh. Hemi hnuah hian court chuan González manna tur thupek hi a ti chhuak zui a ni.

Venezuela vice president Delcy Rodríguez chuan Caracas-a Spanish Embassy-ah González hi lutin, Spain sorkar chu humhimna pe turin a dil niin a sawi. Spanish media te chuan Spain sorkar chuan González hi political asylum pek a remti tih an tarlang bawk.

Inthlana President Maduro tlinga puan a nih aṭangin Venezuela ram chhung boruak hi a ṭha lo hle a, tualchhung buaina chhuak kaihhnawihah sorkar chuan mi 2,400 chuang a man tawh a ni. Ram tam takin Maduro tlinga puan hi a la pawmpui lo a, heng zingah hian US, European Union leh Latin America ram eng emaw zat an tel.