West Bank-Jordan ramri ah Israel mi 3 kap hlum

Israel-in Palestinian ram a luah, West Bank leh Jordan inrina, Allenby Bridge border crossing bulah nimin, September 8 khan silai keng mi pakhatin Israel mi pathum an kap hlum a, pawikhawihtu hi security force-ten an kap hlum zui ve nghal a ni.

Israel sipaite chuan pawikhawihtu hi Jordan lam aṭanga truck rawn khalh lutin, truck aṭanga a chhuk hnuah lei-a Israel sipai duty-te lamah silai a pawng kah niin an sawi. A silai hmehpuahah hian Israel civil mi pathum an thi a ni. He thil thlenna hmun hi Israel thununna hnuaia awm, commercial cargo area bulah niin, hetah hian Jordan aṭanga West Bank-a lut truck-te chuan an thil phurhte an hlanthla ṭhin.

Jordan chuan he pawikhawihna thleng vang hian Allenby Bridge crossing chu tiam chin awm loin a khar nghal a, thil thleng chu chhui chian a ni dawn tih a sawi. Israel pawhin Jordan nana khawmual lam ramria an inkalpawhna pathum pawh a khar ve nghal bawk.

Pawikhawihna thlenna hmun hi Dead Sea hmarlama awm niin, West Bank-a Palestinian-te tana internanational entry point awmchhun a ni. He crossing-ah hian private security guard bakah Israel security force-te an awm a ni.

Inrinni vek han Israel sipaiten Gaza-a airstrike an neihah mi panga an thi. Gaza health ministry chuan thla 11 chhung Gaza Strip-a indona thleng vangin Palestinian mi 40,000 chaung an thi tawh niin a sawi a, civil mi leh firfiak pawl member zat erawh a sawi hrang lo thung. Indona avang hain Gaza-a cheng, mi maktaduai 2.3 zinga a tam zawk chuan an awmhmun ṭum eng emaw zat an sawn phah tawh bawk niin a tarlang.