Super Typhoon Yagi-in Vietnam-ah chhiatna nasa tak thlen

Super Typhoon Yagi in na taka Vietnam a nuai avang in chhiatna hrang hrang a thlen a, ruah a ken tel bawk vangin ruahsur vangin leimin nasa tak a thleng a, chhiatna thlenga nunna chan hi mi 14 an chuang tawh. Hliam tuar hi 176 chuang an awm bawk.

Thlipui tleh vang hian tuipui kam hnaiha cheng zinga mi 50,000 dawn chu hmun him lama sawn chhuah an ni a, thuneitute chuan mipuite chu pawn chhuak loa tawmim turin an chah a ni.

State media-in a tarlan danin, Inrinni zanlai bawr vel khan Vietnam hmarlam, Hoa Binh province-ah leimin nasa tak a thleng a, chhungkaw khata member pali te chuan nunna an chan a ni. Thlipui thawk hian in leh motor a ti chhe nasa hle a, Hanoi khawpuiah pawh power supply a khaihlak phah bawk.

Indo-Pacific Tropical Cyclone Warning Center chuan Hai-Phong leh Quang Ninh province-ah thli hi 203 km/hr(126 mph) a chakin a tleh a ni tih an tarlang.

Super Typhoon Yagi hian Vietnam hma hian China a nuai bawk a, Hainan provicne-a cheng mi 400,000 chu hmunhim lama insawn chhuak tura tih an ni. Hemi hma, kar liam ta kar tir lam khan Philippines hmar lamah tlehin, chhiatna a thlenah mi 16 an thi bawk.