Hamas mi hrente an chhanchhuah hman loh vangin Israel PM-in Israel mipuite hnenah ngaihdam a dil

Israel prime minister Benjamin Netanyahu chuan Hamas firfiakten Israel mi an man, mi parukte an thah chungchangah Israle mipuite leh mitthi chhungte hnenah ngaihdam a dil. Heng mi parukte ruang hi Inrinni liam ta khan Israel sipaite chuan Gaza-a leiverhah an chhar a ni.

Prime Minister Netanyahu chuan Thawhṭanni zana press conference a neihah, "Nungdam a kan hruai haw theih loh avangin in min ngaihdamna ka dil e," tiin heng mi parukte hi an hnung lam aṭangin an lu ah hnai tak aṭanga kah an ni, a ti. Israel sipaiten an chhanchhuah hman tep thu a sawi bawk. Hamas-te chuan an pawikhawih man an tuar ngei dawn tih Israel PM chuan a sawi.

Israel sipai thupuangtu, Daniel Hagari pawhin mi parukte chu October 7, 2023-a Hamas-ten Israel an beih ṭuma an mante vek a ni tiin, an hrenna hmun an thlen hma lawkin firfiakte hian rawng takin an lo that a ni, a ti.

Netanyahu chuan Israel chuan Egypt-Gaza border-a Philadelphi Corridor a thunun chhunzawm zel a ṭul thu a sawi. Helai hmun hi United States, Egypt leh Qatar te hmalaknaa Israel leh Hamas-te inremna an siam theihna tura an buaipui ber zingah a tel a ni. Hamas chuan helai hmun aṭang hian Israel sipaite chu inhnukdawk vek turin an phut. Mahse Israel PM chuan Philadelphi Corridor kaltlanga Hamas-ten an mi hren mekte an hruai chhuah lohna turin an thununna hnuaia a awm tlat a ngai tih a sawi thung a, midang nawrna avangin a ngaihdan sut mai mai a tum lo tih a sawi zui bawk.