Venezuela eptu candidate manna thupek ti chhuak

Venezuela Judge chuan an ram president thlanna neih zawh taka eptu pawl candidate, Edmundo Gonzalez manna tur, arrest warrant a ti chhuak.

July thlaa President thlanna neihah hian Nicolas Maduro chu tlingah puan a ni a, hetih lai hian eptu pawl lam chuan polling data aṭangin Gozalez hi a tling zawk niin an sawi thung.

Electoral council hi Maduro kaihhruai sorkar thlawptu lam tamna an ni a, public prosecutor office pawh Maduro thlawptu rinawm tak a ni bawk. Judge Edward Briceno chuan public prosecutor office aṭanga petition a dawn veleh, Gonzalez manna tur thupek hi a ti chhuak nghal a ni.

Venezuela President thlannaah khan Gonzalez hian an ram president ni lai, Maduro hi a khing a ni. Electoral council chuan Maduro hi a chak zawk niin puang mah se, a chak zawk a ni tih finfiahna erawh tun thlengin tih chhuah a la ni lo. Inthlan result kimchang an tih chhuah theihloh chhan chu an website chu hack sak niin, data pawh en theih loin a awm niin an tarlang a, mahse observer lam erawh chuan hei hi an pawmsak lo thung.

Hetih lai hian eptu lam chuan voting data hi online-a tichhukin, hetah hian Gonzalez chu inthlanah hian hnehna changin, 30% aia tamin a chak zawk niin a sawi. He data an tarlan hi Judge-in Gonzalez manna tur thupek a tih chhuah chhan pawh a ni zui a, document tichingpen leh, mipuiah lungawi lohna tuh leh kalphung tihchhiatna thlenahte public prosecution office chuan a puh. Gonzalez hi inthlan zawh hnu lawkah a biru zui a, an puhna hrang hrangah hian tih sual engmah a neih loh thu a sawi.

Maduro chu tlinga puan ni mah se, European Union chuan voting tally kimchang a hmuh hma chuan a pawm dawn lo tih a sawi. Latin America ram eng emaw zat pawhin Maduro an pawm thu an la sawi lo. US pawhin Gonzalez chuan vote a hmu tam zawk a, Maduro hi inthlanah a chak lo tih finfiahna tur tam tak a awm a ni, a ti. Mahse Venezuela sorkar thunun, National Electoral Council chuan Maduro hi tlingah a puang thung a, a term thumna atan Venezuela President a ni leh a ni.

Inthlana Maduro a chak zawk nia puan a nih hnuah ram chhungah lungawi lohna lantir a ni chho a, tun thlengin boruak a la pangngai thei lo. Nawrh huaihawtnaa buaina chhuak vang hian Thawhṭanni thleng khan mi 27 an thi tawh a, hliam 192 an awm bawk.