France : Ram kang vangin mi sang tel sawn chhuak

France ram hmar lama ram kang nasa tak chhuak avangin August 18, Pathhianni khan mi sang tel hmun him lamah sawn chhuah an ni tih official-te chuan an sawi.

Chhanchhuah hna thawktute chuan thli na tak tleh tel avangin kangmei hi chak takin a ṭaidarh a, hei vang hian chawlh hmanga camp, mi 3,000 chuang chu Perpignan khawpui bula Canet-en-Roussillon hmuna municipal building-ah sawn an ni tih an sawi.

Kangmei chhuak hian mobile home pakhat kang chhiain, chenna in panga an chhe nual bawk. Mahse kangmei hi ṭhelh mih a ni tawh tih chhanchhuah hna thawktute chuan an sawi a ni.

Montpellier khaw bul, tuipui kam khua Frontignan-ah pawh ram kang vang hian chhungkaw eng emaw zat chu sawn chhuah an ngai bawk. Helai hmuna ram kang hi darkar hnih leh a chanveah ṭhelh mih a ni bawk niin regional firefighters thupuangtu, Jerome Bonnafoux chuan a sawi. Hetih lai hian hmun ṭhenkhat, kangmei chhuah leh mai hlauhthawnawmna hmun a la awm avangin hna thawh chhunzawm reng a ni tih a sawi bawk.

Kangmei chhuak hian ram hectare 300 ( acre 740) vela zau a kang chhe tawh a ni. Montpellier aṭanga Spain ramri dep, A9 highway bul aṭanga inṭan niin, kangthelh hna thawk tu 600 chuang chu kangmei chhuak ṭhelh tur hian Pathianni khan rang taka tirh an ni a, a zatve chu a hmun a hna ṭul thawk chhunzawm turin an awm chilh nghal a ni.