US : Republican-in paihthlak theihna khawp thilsual tiah Biden an puh

United States House of Representatives-a Republican-te chuan Joe Biden chu president a nihna aṭanga paihthlak (impeached) theihna khawp thil sual a ti niin an sawi. Biden hi thuneihna hmang sual leh a fapa Hunter Biden leh a laina hnaite sum chungchanga chhuichian an nih ṭuma rorelna dik daltuah an puh.

Republican hian Biden-a thil tihsual kum khat dawn an chhuina report chu August 19, Thawhṭanni khan ti chhuakin, Biden chhungkua chu sumdawnnaa thil dik lo taka ti ṭhinah puhin hei hi impeached theihna khawp pawi khawihna a ni, an ti. Republican-te chuan bank record, thuhretu 30 chuang leh lehkha pawimawh dangte chuan Hunter Biden chu ramdang mite nena sumdawnna thila inremna siam nan, sorkara an thuneihna hmang ṭangkai ṭhin a ni tih an tarlang. Hei hi kum 2014-a US vice president a nih lai aṭanga inṭan tawh a ni tih report chuan a tarlang bawk.

Biden chhungkua leh an thurualpuite chuan sumdawnna thilah USD mtd 27 chuang hlawkna China, Russia leh ramdang sumdawngte aṭangin an dawng tih Republican-te chuan sawiin, hemi bakah hian USD mtd 8 chu Hunter chuan loan angin a dawng niin an sawi bawk. Heng thil hi Joe Biden chuan a hriatpui loh a rinawm lo a ni, an ti.

President Biden hian a dinhmun chu hmang ṭangkaiin an chhungkaw sum lakluh a pun theih nan a hmang tih report chuan tarlang a, Biden chuan hemi chungchanga House hmaa insawifiah tura an tihna chu a hnawl. Republican zingah Biden paihthla tura hma lak duh lo an awm a, Democrats presidential candidate Kamala Harris laka ngaihtuahna sen duh zawk an awm a, hemi avang hian Biden paihthla tur hian hma lak chhunzawm a ni dawn em tih a chiang lo a ni.