Hamas-in inkahhai thuthlung an hnawl

Gaza Strip-a indona a tawp theih nana remna palai - US, Qatar leh Egypt ten inkahhai thuthlung an siam chu Hamas in an hnawl. Israel chan a ṭha dawn nia an hriat avangin Hamas hian an hnawl a ni.

Hamas hian Doha inbiaknaa palai an tirh loh avangin inkahhai puan a nih theih nana ruahmanna siamte hi Doha inbiakna zawh hnuah an hnen a thleng chauh a, inkahhai thuthlung an duan hi Israel prime minister Benjamin Netanyahu duh dan zulzuia siam nia a ngaiin an hnawl.

Israel PM Netanyahu hian Gaza indona tihtawp a duh loh bakah a sipaite hnuh kir a tum lo niin Palestinian pawl lam hian an sawi. Netanyahu chu remna palaite inpekna ti hlawhchhamtuah an puh a, "inremna tikhawtlaitu a ni" an ti. Gaza Strip-a thil nung zawng zawng bitum ṭhin a ni, tiin Hamas chuan an sawi bawk.

US, Qatar leh Egypt chu mawhphurhna la ngam tura chahin July thlaa ruahmanna siam an lo pawm tawh chu kaltlang pui tura an duh thu Hamas chuan an tarlang. Israel chu he inremna pawm tura hmin tum turin remna palaite chu an chah bawk.

Hamas hian US Secretary of State Anthony Blinken-a'n inbiakna nei tura Israel a thlen hnu lawkah thuchhuah hi an siam a ni. Blinken hian remna an neih theih ngei ringin Israel hi a pan a, inkahhai puang tur leh mi tang chhuah a nih theih nan Israel hi hmin a tum dawn a ni.