Philippine President hlui sawiseltu thubuai titawp

Philippine court chuan an ram president hlui, Rodrigo Duterte leh ruihhlo do beihpui, 'war on drugs' a kalpui dan sawisel ṭhintu, Senator Leila de Lima laka thubuai siamsak chu a titawp.

President hlui Duterte-a kaihhruai sorkarin ruihhlo do beihpui an thlaknaah khan, ruihhlo zuar leh ti ṭhin tam tak chu police-te kutah an thi a, rinhlelhawm taka thi eng emaw zat an awm bawk. Ruihhlo do hna kalpui a nih dan hi rights group leh eptu pawl hrang hangte pawhin an sawisel nasa hle a, mahse police-te chuan mahni invenna atan chauha bei let niin an in sawi thung.

Duterte 'war on drugs' kalpui dan sawiseltu langsar tak chu minister hlui, Leila de Lima hi a ni. Mahse Duterte hian de Lima hi justice minister a nih lai, kum 2010-2015 khan ruihhlo zuarte thurualpuiah a puh thung a, ruihhlo tawlhrua puhna thubuai siamsak a ni zui bawk. A thubuai ngaihtuah chhungin de Lima hi kum ruk chuang jail-ah a tang hman a, nikum November thla khan bail-in a chhuak a ni.

A thubuai pahnihah hian thiam a chang tawh a, thubuai dang pakhat a la neih hi Thawhṭanni khan court chuan a titawp sak ta a ni. Heng a thubuaiahte hian thiam loh chantir a nih chuan dam chhung lung-in tan tir theihna vek a ni. De Lima chuan thubuai an siamsakna hi thu dik lo, President Duterte kaihhruaia ruihhlo do beihpui an thlaknaah mipuite thlawpna an hmuh ṭhat theihna atana an phuahchawp mai mai niin a sawi.