Bangladesh-in Rohingya raltlan lak luh belh tum tawh lo

Bangladesh chuan a ṭhenawm, Myanmar tualchhung buaina avanga an rama Rohingya raltlan luh tumte chu lak luh belh a tum tawh lo tih a sawi. Tun hnaiah Rohingya mi eng emaw zat Bangladesh-a luh tumin ramriah an awm nia sawi a ni.

Myanmar-a rorellai, sipaite leh sipai sorkar dodaltu helpawl hrang hrangte tun hnaiah an inbei ngawrh leh hle a, hei vang hian himna zawnga tlanchhia pawh an pung chho leh a ni. A bikin Rohingya-te tamna, Rakhine leh Chin state-ah hian nikum October thla aṭang khan sipai leh helpawl hi an inbei leh nasa a ni.

Kum 2017 khan sipaite beihpui thlakna avangin Rakhine state aṭang hian Rohingya mi tam tak chu Bangladesh-ah hian an tlanchhia a ni. Bangladesh-a Cox Bazar chu khawvela refugee camp lian ber awmna niin, he hmunah hian Rohingya raltlan hi maktaduai khat chuang an awm.

Bangladesh refugee relief and repatriation commissioner, Mizanur Rahman chuan Rohingya zingah Bangladesh luh tuma ramria inkhuar eng emaw zat an awm tih an hriat thu a sawi. Mahse raltlan lak luh belh thei an ni tawh lo a, hei vang hian Myanmar aṭanga luh belh pawh an remti dawn lo tih a tarlang.

UN chuan Bangladesh-a Rohingya raltlan awm mek zinga 95% chu chhawmdawlna pek ringa khawsa an ni tih a sawi a, kum 2020 aṭang khan chhawmdawlna an dawn ṭhin pawh hi a tlakhniam thu a sawi. World Food Program leh UN High Commisisoner for Refugees chuan raltlante tana sum tam zawk pe turin ram hrang hrangte ngen ṭhin mah se, an sum hmuh zat erawh a tlahniam nasa hle thung. Bangladesh ministry of disaster management and relief chuan raltlante awmna tur hmun siam nan leh enkawlna atan hian USD tld 2 vel an seng tawh niin a sawi a ni.