South Korea-a factory kangah mi 22 an thi

South Korea-ah Thawhṭanni khan lithuim batterry siamna hmun a kang a, mi 22 an thih bakah mi pariat in hliam an tuar. Nunna chan zinga a tam zawk hi China khua leh tui niin SKorea-ah hian inhlawh tura kal an ni.

Kangmei chhuahna hmun hi Hwaseong city niin Seoul chhim lam awm a ni. Kangṭhelhtute chuan Thawhṭanni zing dar 10:30 vel khan factory-a hnathawkten battery an endik lai leh an pack laiin battery cell ṭhenkhat chu battery dahkhawmna hmunah a puak niin an sawi. Kangmei hi darkar ruk hnuah ṭhelh mih theih chauh niin, thuneitute chuan kangmei chhuah chhan tak hi chhui chian a ni dawn tih an sawi.

Factory hi Aricell battery siam chhuahna hmun niin kangmei vang thi tam zawk hi battery kangin boruak ṭha lo a pek chhuah an hip luh vanga thi an nih a rinawm tih thuneitute chu an sawi. Mi 22 thi zinga 18 hi Chinese niin SKorea mi pahnih leh Laos mi pakhat an thi a, mi pakhat a nihna hriat loh a la awm bawk.

Gyeonggi province fire official, Cho Sun-ho chuan ramdang mi kangmei vanga thite chu indaih lohna vanga chhawr lailawk an nih thu leh building awm dan an hrechiang tawk lo nia a hriat thu a sawi. Lithuim-ion battery hi electronics thil, cellphone leh laptop battery atana hman niin pack ṭhat a nih loh emaw chhia a awm emaw a nih chuan overheat in a kang emaw a puak thei a ni.