Ukraine-in Russia oil sawngbawlna hmun 30 a kap : Ukraine President

Ukraine president Volodymyr Zelenskyy chuan an ramin Russia oil sawngbawlna leh dahṭhatna hmun 30 chuang an kap fuh tawh tih a sawi. Ukraine hian kumin aṭang khan Russia oil sawngbawlna hmun hi a bitum ṭan a, hei hi Russia sum dinhmun chu tun aia ṭha lo zawka hnuhluh a duh vang a ni.

President Zelenskyy hian State Security Service (SBU) hmaa thu a sawinaah he thu hi sawiin, eng hun chhungin nge Ukraine hian a kah tih a sawilang lo thung. Russia chu firfiak ram (terrorist state) tiin a sawi a ni. Ukraine hian a ram sipai leh SBU siam chhuah long-range drone hmangin Russia hi a bei ṭhin a ni. Zelenskyy chuan drone hmangin hmun hla zawk an kap thei tih chu chhuang takin a sawi a, "SBU drone tan chuan km 1,500 a thui kap tur pawhin buaina a awm lo" a ti.

Tun hnaiah Russia oil sawngbawlna leh thlitfimna hmunte chu Ukraine drone hian a bei fo a, May 9 khan Bashkiria region-ah Russia ram oil thlitfimna hmun lian ber 10 zinga pakhat chu beiin hemi hma hian vawi tam a beih tawh bakah hemi hnu lam pawh hian Ukraine chuan drone hmanga a beihna hi a kalpui zel a ni.