Vanglaini - Mexico-ah Covid-19 vanga thi nuai tling tawh

KHAWTHLIR

Hnam dang truck phalsak rih lo

Champhai Import-Export Transport Forum (CEITU), Mizoram Export-Import Union, Importer Exporter Syndicate, MTOA leh MTDA-te November 19, 2020-a ṭhukhawm chuan, Covid-19 hripui laka mipui an him zawk nan hnam dang truck-te'n kumin chhung chuan Champhai aṭangin bungrua phur chhuak ve tawh rih lo se, an ti.

Inhlawhna siamsak

Aizawl North-II MLA Dr Vanlalthlana chuan Covid-19 lockdown avanga a bial chhunga khawsak harsa zawkte tan inhlawhna a siamsak. Covid-19 léng vanga sorkarin inkhàrkhip a kalpui a ngai a, mi tam takin hna thawk thei loin harsatna an tawh avangin, MLA hian a biala chhungkaw 200 chuang tan inhlawhna a siamsak a; thlànmual leh veng chhung hmun ṭhenkhat tihfai a ni.

SRH-ah mi 45 awm

State Referral Hospital-ah nimin khan Covid-19 vei mi pakhat dah luh a ni a, ani nen mi 45 an awm mek a, an zingah kum 60 chung lam mi 16 an tel. SRH-ZMC Bulletin tarlan danin, mi 45 zinga pathum chu ICU-ah enkawl an ni a, mi dang zawng chu Isolation ward-ah an awm a ni.

Journalist thi rál

Chanchinbumi July 14, 2020-a thi Francis Paul (Gerrard-a Pa) chhungte hnenah Mizoram sorkarin a ràlna Rs. 1,00,000 chu nimin khan IPR director Lallianpuii'n Mizoram Journalist Welfare Society kaltlangin a hlàn. Ràlna inhlanna hi IPR Director pisaah neih a ni a, MJA hruaitute an tel. Francis Paul hi Doordarshan Kendra, Aizawla sports magazine buatsaihtu ṭhin a ni a, MJA member a ni.

Complaint tum

ZPM chuan, January 16, 2020-a Tripura leh Mizoram sorkarin Ministry of Home Affairs kaihhruainaa inremna an siam tawh hnu pawha Tripura-a khawsa zui ta Bru-te Mizoram Electoral Roll aṭanga tun thlenga paih an la nih loh avangin Election Commission of India-ah complaint thehluh an tum thu an tarlang. ZPM hian ECI-a zualkona hi Mizoram Chief Electoral Officer kaltlangin November 23, 2020-ah thehluh an tum a ni.

DAWNTISEI

Mexico-ah Covid-19 vanga thi nuai tling tawh

Johns Hopkins University tarlan dan chuan Mexico rama Covid-19 hri vanga thi chu mi 1,00,104 an tling tawh.

Ningani khan Mexico ramah hian Covid-19 hri vanga thi hi mi 576 an awm belh a, anni nen hian Mexico rama hri vanga thi hi mi nuai khat an chuang tawh a ni. Mexico hi khawvel ram hrang hrang zinga Covid-19 vanga thi tam berna ram palina a ni mek a ni.

US chu Covid-19 vanga thi tam berna ram a ni mek a, Brazil chuan dawtin he hri vanga thi hi mi 1,68,141 an awm ve tawh bawk a, India-ah chuan mi 1,32,202 in hripui hi an thihpui tawh bawk.

Mexico-a Covid-19 hri kai thar hmuh chhuah tawh mi 1,019,543 awmin, an zinga mi 7,66,361 chu enkawl dam an ni tawh thung.

Johns Hopkins University chuan Mexico-a mihring cheng zat hi maktaduai 125 chuang an nih thu a tarlang a, Covid-19 vanga thihna rate (mortality rate) hi 9.8% a ni. Mipui tam dan aṭanga teh chuan Mexico ram hi he hri vanga thi tam berna ram zingah a tel pha a ni.

Share this Post

Login to comment

No Comments