Cipher case-ah Imran Khan thiam chantir

Pakistan-a Islamabd High Court chuan an ram prime minister hlui, Imran Khan bakah foreign minister hlui, Shah Mahmood Qureshi-te chu ram palaite inbiakna puangzara puhna, cipher case-ah thiam a chantir.

Kumin January thla khan Islamabad special court chuan Official Secrets Act hnuaiah Imran Khan leh Qureshi-te hi he thubuaiah hian thiam loh chantirin, kum 10 tang turin a lo hrem tawh a ni.

Imran Khan hian Islamabad-a public rally a neihnaah, Pakistan Prime Minister a nih laia US-a Pakistan embassy thu thawn chu mipui hmuhah a pholang a, hei hi ram pawn lam aṭanga kaihhruai sorkar paihthlak tuma beih a nih thu a sawi finfiahna atana a ti a ni. Islamabad Court-in thiam loh a chantirna hi Khan leh Qureshi-te hian High Court-ah an khing let a, Thawhṭanni khan court chuan hei hi ngaihtuahin, thiam a chantir a, thubuai dangah man tura tih an nih loh chuan jail aṭanga chhuah turin a ti nghal bawk. Mahse an thubuai dangahte thiam loh chantir an nih avangin jail aṭang chuan chhuahtir an nih a rinawm lo thung.

Kum 71 mi, Imran Khan hi kum 2022, April thlaa Pakistan prime minister a nihna aṭanga paihthlak a nih hnuah thubuai eng emaw zat siamsak ni tawhin, a thubuai neih hi 200 dawn a tling tawh. Heng zinga ṭhenkhatah chuan thiam loh chantir ni tawhin, hremna pawh tih chhuah a ni tawh a, nikum August thla aṭang khan jail-ah dah a ni tawh a ni.