North Korea-in ei leh barah harsatna tawk nasa

Hripui leng vanga ramri khar vang te, thlipui tleh leh US-in a puih ṭhinna a tihtawp avangin North Korea chaun kumin hian kum dang aiin ei leh bar lamah harsatna a tawk nasa hle. 

August thla khan North Korea-ah hian thlipui tlehin, chenna in tam tak a tichhia. Hei bakah hian ruahsur nasa vangin tuilian an tuar bawk. 

Tuilian hian thlai leh thlai chinna hmun tam tak a tichhia a, NKorea hotu Kim Jong-un chuan tuilianin a tihchhiate hi a hmunah pawh a lo en tawh a, sorkar chuan an harsatna sutkianna turin theihtawpa hma lak a tum thu a sawi tih Korean Central News Agency chuan a tarlang. 

United Nations World Food Program chuan NKorea-a mi 100 zela mi 40 chuan chaw khawpkham an hmu lo tih a sawi. Hei hi nikuma buh leh thlai lama harsatna an tawh vang te, hri leng vanga an inkharkhip avanga China aṭanga thlai thar lakluh kawnga harsatna a awm vang te nia sawi a ni. 

UN Special Rapporteur on North Korean humanrights chuan mi tam tak chuan an in leh thil neihte hralhin, an dam khawchhuah theihna turin loan lain,tlang ram lamah thlai chinte an intihhmuh nasa niin a sawi. Hetih lai hian NKorea ram hi 22% vel chauh thlai chinna tlak niin UN Food and Agriculture Organisation chuan a sawi. 



Share this Post

Login to comment
No Comments