Trump-a fapain Covid-19 a kai

US president Donald Trump-a fapa, kum 14 mi Barron Trump chuan Covid-19 a kai a, mahse a result erawh a negative tawh tih a nu, First Lady Melania Trump chuan nimin khan a sawi. 

Melania Trump chuan a fapain Covid-19 a kai tih an hriat chuan an hlauthawng hman hle tih a sawi a, mahse rawlthar hrisel leh chak tak a ni a, a taksaah pawh harsatna a nei lo tih a sawi. President Trump pawhin Iowa-a rally a neihnaah Barron-a'n hri a kai ve thu leh, mahse a la naupangin a immune system-te a chak ṭhat avangin reilote hnuah a dam leh thuai thu a sawi. 

Donald Trump leh Melania Trump-te hian October 1 khan Covid-19 an kai tih an twitter-ah an tarlang ve ve a, an fapa pawh hi anmahni aṭanga kai chhawng nia hriat a ni. 

President chuan a fapa hri kai, reilotea a dam leh nghal chungchang chu America rama school-te hawn thuai a ṭul tawh thu sawi nan a hmang zui. 'Hri hi an kai a, an dam leh mai. Naupangte chu school kal tir an hun tawh a ni," a ti.  Mahse zirtirtu pawlte chuan zirlai naupangten hri an kai an hlauhthawn avangin school hawn hi an la duh lo a ni. 



Share this Post

Login to comment
No Comments