Covid-19 hri kai nawn leh hnuah Dutch hmeichhia a thi

Netherlands rama Dutch hmeichhia, kum 89 mi chu Covid-19 a kai nawn leh hnuah he hri vang hian a thi a, hri kai nawn zinga thi hmasa ber niin Maastricht University Medical Cente chuan a tarlang.

Thla hnih dawn kalta khan he hmeichhia hian Covid-19 a kai tih hriat a ni a, ni nga chhung damdawi-ina enkawl a nih hnuah chhuah tir a ni. Amah hi thisen cancer nei a nih vangin chemotherapy treatment a la ve reng a, tun hnai  khan khawsik, khuh leh thawk lama harsatna a nei leh a, Covid-19 a kai nawn leh tih hriat a nih hnuin October 14 khan a thi a ni.

Thisen an test aṭanga a lan dan chuan a taksaah hian coronavirus antibodies a awm lo a, chemotherapy treatment a lak avang hian a immune system hi a chak loh phah nia sawi a ni. Hei vang  hian hri a kai nawn leh hi a tuar na hle a, a thihpui ta niin a lang.



Share this Post

Login to comment
No Comments