Vanglaini - Thailand-ah nawrh huaihawt vangin emergency puan a ni

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

Thailand-ah nawrh huaihawt vangin emergency puan a ni

Thailand sorkar chuan thla ruk chhung zirlaite kaihhruaia an ram lal thuneihna ennawn a, prime minister Prayuth Chan-ocha ban phuta nawrh huaihawt tihtawp a nih theihna atan nimin khan state of emergency a puang. Nimin zing khan nawrh huaihawtnaa an hotu pahnihte bakah activist 20 man an ni bawk.

State of emergency hnuaiah hian mi panga aia tam awmkhawm phal a ni lo a, an ram himna tiderthawng thei thil news tihchhuah leh, online-a post khap a ni bawk a ni.

Thailand ram lal thuneihna sawisel a, PM ban phut hian zirlaite kaihhruaiin hun rei tak nawrh huaihawt a ni tawh a, Nilaini khan Bangkok-ah mi tam tak pungkhawmin kawng an zawh a, prime minister office, Government House pawnah an inkulh zui a ni.

Government House pawn lama inkulhte hian lal motor an lo dang a, democracy movement entirna, three-fingure salute an lo pe zui bawk. Hemi hnu hian police-te chuan pungkhawmte hi hnawtdarhin, an hotu Parit 'Penguin' Chirawat leh rights lawyer Arnon Nampa chu an man a, a hnuah an hruaitu dang Panusaya “Rung” Sithijirawattanakul pawh an man leh bawk.

Sorkar chuan buaina a punlun zel lohna atan leh, boruak muanawm a awm theihna atan state of emergency chu puan ngei a ṭul tih sawiin, nimin zing aṭang khan hman nghal a ni. Mahse nawrh huaihawtte chuan emergency puan ni mah se, an lungawi lohna lantira nawrh huaihawt chhunzawm zel an tum thu an sawi thung.

Royal taboo

Nawrh huaihawt a nihna chhan ber chu kum 2014-a sipai chakna hmanga sorkar paihthla a, prime minister dinhmun luah zuitu sipai hotu hlui Prayuth paihthlak a ni.

Hei bakah hian an ram lal hnena thuneihna sang tak pek chu tihnep a nih theihna atan ram danpui siam ṭhat an phut bawk.

Thailand-ah hian lal hian thuneihna sang tak a nei a, lal leh lal chhungkuate sawisel zawnga thu sawi leh ziak pawh pawikhawihna lian tak anga ngaih niin, hremna na tak, kum 15 thleng tantir theih an ni. Hei hi duh loin July thla aṭang khan zirlaite kaihhruai hian nawrh hi huaihawt a ni.

Hetih lai hian lal rorelna thlawptu mi tam tak an awm mek bawk. Kum 700 chuang lal rorelna hnuaiah an awm tawh tih sawiin, lal thuneihna tihbo leh tihnep chu an duh loh thu an sawi.

Share this Post

Login to comment

No Comments