Vanglaini - China President-in sipaite indo inpeih reng turin a chah

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

China President-in sipaite indo inpeih reng turin a chah

China President Xi Jinping chuan Guangdong province-a military base a tlawh a, People's Liberation Army (PLA) sipaite chu indo inpeih renga awm turin a chah nia sawi a ni.

CNN chuan hemi chungchang hi tichhuakin, President Xi chuan China sipaite chu inring renga awm tur leh, rinawm leh innghahna tlaka awm turin a fuih a ni.

President Xi hian Shenzhen Special Economic Zone din champha vawi 40-na lawmnaa thu sawi turin Thawhlehni khan Guangdong hi a tlawh a, Chaozhou-a PLA Navy Marine Corps te a lo endik bawk.

Shenzhen Special Economic Zone hi kum 1980-a din niin, China economy tana hmun pawimawh tak,khawvela economy lian ram pahnihna a nih theihna pakhat a ni.

President hian sipaite inralring reng tura a chahna hi khawi ram chungchang a sawina nge tih sawilang chiah lo mah se, China hi tunhnaiah ramri chungchangah India nen an inkar a ṭha lo hle a, hei bakah hian South China Sea inchuhnaah Japan leh a ṭhenawm ramte nen a inkar boruak a ṭha lo hle bawk. Taiwan ram leh Covid-19 chungchangah pawh US nen inhriatthiam lohna lian tak an nei mek bawk a ni.

Mahnia ro inrel, Taiwan hi China chuan a ram bung pakhatah a ngai a, US President Donald Trump-a rorelna hnuaia US leh Taiwan inlaichinna ṭha chho mek chu a ngaimawh hle. Taiwan chhehvela military drill a neih ṭhin pawh lian zawka kalpuiin, September 18-19 khan Taiwan ram chinah indo thlawhtheihna 40 lai chu a lo thlawh luh tir tawh bawk.

Share this Post

Login to comment

No Comments