Indonesia : Tlang kang bul hnaia cheng mi 400 chuang thiar chhuak

Indonesia chhak lama Halmahera thliarkara tlang pakhat, Mount Ibu chu a kan avangin a bul hnaia cheng mi 400 vel bawr chu hmun him lamah thiar chhuah an ni tih thuneitute chuan nimin khan an puang.

Mount Ibu tlangkang hi May 16 thleng khan vawi hnih nasa takin a kang a, hemi avang hian thuneitute chuan hlauhawm chin tehnaah a sang ber a thleng tawh tih tarlangin, a bul hnaia chengte hi hmun him lama thiar chhuah an ni. Mount Ibu kang hian meivap leh meikhu metre 5000-a sangah a phuh chhuak a, helai bul hnai khaw pasariha chengte chu thiar chhuah an ngaih phah ta a ni.

Muhammad Ade Fabanyo, disaster mitigation agency thuneitu pakhat chuan nimin zing thleng khan mi 400 thiar chhuah tawh an nih thu sawiin, mihring thiar chhuah hna hi kalpui reng a la ni tih a sawi. Disaster lama mithiamte'n tlang kang aṭanga teh kuala kilometre 7 chu a him lo tia an sawi avangin hemi huam chhunga chengte chu fimkhur thilah thiar an chhuak ta niin a sawi.

Mount Ibu tlang hi nikum chhung pawh khan vawi tam tak a kang a, Pacific "Ring of Fire" huam chhunga awm a nih avangin khawvela tlangkang zing ber pakhat a nih bakah lir pawh a nghing ngun hle. Thuneitute chuan khualzinte leh Halmahera thliarkara chengte chu a hlauhawm chin kilometre 4 aṭang 7 hnaihah kal lo tur leh, meivap tla an hip luh tam loh nan hmaituam ṭha turin an hriattir a ni.