Pakistan-in school leh university hawng

Pakistan chuan Covid-19 hri leng vanga thla nga chhung dawn zirna in hrang hrangte an khar hnuah, nimin aṭang khan school leh university-te an hawng leh ṭan ta. 

High school, college leh university-te chu nimin aṭang khan kal ṭanin, Class V-VIII erawh chu September 23 aṭangin an kal dawn a, primary school chu September 30-ah hawn a ni ang. 

Health department-in hri leng laka invenna tura kaih­hruaina a siam angin, zirna inte hi hawn ni mah se classroom pakhatah zirlai 20 aia tam awm phal a ni lo. Zirlaite chu group hrang hrangah ṭhenin, a ni inchhawkin an kal dawn a ni. 

Zirlai leh zirtirtute chu mask hmang vek tura tih an ni a, school luh dawnah kut silna hmun leh hand sanitizer-te dah vek tura tih an ni bawk. 

Pakistan-ah hian nimin thleng khan Covid-19 kai 3,02,424 an awm tawh a, mi 6,389 in an thihpui tawh bawk. Hri kai zinga 2,90,261 chu enkawl dam an ni tawh thung.



Share this Post

Login to comment
No Comments