Trump-a’n a let 1,000 chuanga naa beih letah Iran vau

US president Donald Trump chuan Thawhṭanni khan Iran-in US a bei a nih chuan, a let 1,000 chuanga nain an bei let dawn tih a sawi.

Kumin kumtira US-in Iran general leh Iran elite Quds Force hotupa, Qasem Soleimani an thahsak avangin Iran hian phuba lak a tum niin media ṭhenkhat chuan an report a, November thlaa US President thlanna neih hmain Iran hian US hi beih a tum niin an tarlang a ni. 

President Trump chuan hei hi chhang letin, "Eng ti kawng zawng pawha Iran-in US a bei a nih chuan a let 1,000 chuangin US chuan a chhang let ang," tiin Iran hi a vau nghal a ni. 

Hemi chungchang kaihhnawih hi Thawhṭanni vek khan Secretary of State Mike Pompeo chuan sawi chhuakin, Islamic Republic of Iran chu khawvela inthahna thleng tam takah an inhnamhnawih thu a sawi a; US leh Europe-a inthahna thleng te leh khawvel hmun hrang hranga inthahna thlengah Iran chu a inrawlh a ni, a ti. 

Iran hnenah pawh America mi tupawh an beihna chu an ngaizam mai mai dawn lo tih chiang takin an hriattir tawh thu a sawi. 

Hetih lai hian Iran foreign ministry thupuangtu chuan media report tihchhuah hi  ṭanchhan nei lo, thu belhchian dawn lo  niin a sawi a,  hetiang zawnga an report chhan hi khawvel ram hrang hrangten Iran ram an huat theih nana an tih a nih thu a sawi bawk.

Iran navy-te chuan kar liam ta khan American aircraft-te chu Iran military exercise neihna hnaihah an kal thu leh, American aircraft pathumte chu Iran air defence identification zone pelin an kal tih an tarlang  bawk. Nikkum June thla khan US RQ-4 drone chu Iran-in a kap thla a, hei hi US chuan a pha thung. 



Share this Post

Login to comment
No Comments